Eldri fréttir
8.5.1998 - Aðalfundur í aðsigi.
Nokkur umræða hefur verið á póstlistum Netverja um aðalfund að undanförnu og eru jafnframt uppi hugmyndir um víðtækar lagabreytingar, sem miða að því að færa starfsemi félagsins nær grasrótinni. Þá er fyrirhugað að taka upp sérstakt kosningakerfi á Netinu, þannig að félagsmenn geti kosið um stór mál sem smá á nokkurs konar sýndarfélagsfundum. Gert er ráð fyrir að halda aðalfundinn í lok maí og er helst rætt um laugardaginn 30. maí.
29.3.1998 - Ísland í fremstu röð
Samkvæmt samantekt írsks markaðsrannsóknafyrirtækis eru hvergi á jarðkúlunni fleiri netverjar en á Íslandi. Ef marka má höfðatöluregluna víðfrægu. Þar kemur fram að um 45% þjóðarinnar hafi aðgang að Netinu, en í næstu sætum á eftir koma svo Bandaríkjamenn, Kanadabúar, Finnar og Svíar. Tölurnar frá Íslandi eru fengnar frá Gallup. Þrátt fyrir að deila megi um áreiðanleika talnanna er athyglisvert að Íslendingar hafa verulegt forskot á allar aðrar þjóðir, því hæstu tölur frá öðrum löndum eru í kringum 30%.
19.3.1998 - Tekist á um Skímu
Bæði Islandia-Internet og Landssíminn telja sig hafa keypt Skímu/Miðheima, en enn er ekki ljóst hvað rétt er í málinu. Forsvarsmenn Islandiu-Internets hafa hótað því að fara með málið til dómstóla til þess að skera úr um kaupin. Deilur um forkaupsrétt hluthafa Skímunnar/Miðheima blandast inn í málið. Átökin eru hluti af stærri átökum á íslenskum fyrirtækjamarkaði, en þar takast á meðal annarra þeir Jón Ólafsson í Skífunni, Þórarinn V. Þórarinsson, stjórnarformaður Landssímans hf og framkvæmdastjóri VSÍ, Eyjólfur Sveinsson hjá Frjálsri Fjölmiðlun og Frosti Bergsson hjá Opnum kerfum. Málið snýst um heimildir til sölu hlutafjár, en söluverðmæyið mun vera 160 milljónir króna. Sú tala þykir í hæsta lagi, en væntanlega er meirihluti virðis fyrirtækisins fólgið í markaðshlutdeild. Hins vegar má spyrja hvort markaðshlutdeild Islandiu-Internets, ef að kaupum þess verður, stangist ekki á við Samkeppnislög.
22.1.1998 - Netscape-kóðinn gefinn
Í dag tilkynnti Netscape Communications að fyrirtækið hafi ákveðið að gefa kóðan af flaggskipi sínu; Navigator. Þessi frétt vekur mikla athygli um allan heim, enda á Microsoft vart svar við slíku útspili. Nú geta allir sem vilja þróað lausnir ofan á vinsælasta rápara í heimi, jafnt á Íslandi sem í kísildal. Sjá nánar frétt í Wired.
1.1.1998 - Frelsi í fjarskiptum
Frá og með fyrsta Janúar er loksins komið á frelsi í fjarskiptum, en þá tóku gildi ákvæði fjarskiptalaga um afnám einkaleyfis Pósts og síma. Sama dag tók Landssími Íslands við hlutverki P&S í fjarskiptum. Það verður spennandi að sjá hverjir nýta sér þetta og stofna ný fjarskiptafyrirtæki á Íslandi. Þegar hefur verið stofnað Íslenska Farsímafélagið sem er 99,5% í eigu erlendra aðila og er Western Wireless fjarskiptarisinn þar ráðandi. Heyrst hefur að ÍF ætli að keppa á fleiri sviðum en GSM, s.s. með DCS 1800, aukinni þjónustu við GSM viðskiptavini og loks; Internet þjónustu.
18.11.1997 - Opinn fundur með Blöndal
Heimdallur, félag ungra sjálfstæðismanna í Reykjavík, hélt í kvöld opinn fund þar sem frummælendur voru þeir Halldór Blöndal samgönguráðherra, Ögmundur Jónasson formaður BSRB og Kjartan Magnússon blaðamaður og varaborgarfulltrúi. Fundurinn var fjörugur, en í sjálfu sér kom lítið nýtt fram á honum.
13.11.1997 - Fundur með samgönguráðherra - 13. nóvember 1997.
Halldór Blöndal samgönguráðherra kallaði á sinn fund fulltrúa þeirra aðila, sem helst mótmæltu gjaldskrárbreytingu Pósts og síma. Fulltrúar Netverja voru þar á meðal, þau Guðmundur Ragnar Guðmundsson og María Edwardsdóttir. Samgönguráðherra vildi forvitnast um áherslur Netverja í þessum efnum, en eins kynnti hann ýmsar hugmyndir sínar í þeim efnum. Netverjar voru sæmilega ánægðir með fundinn og töldu ýmsa örðugleika hafa stafað af því að ráðherra hefði haft slæma ráðgjafa í símamálum, sumsé embættismenn P&S, sem ekki gætu frekar en aðrir gerst dómarar í eigin sök.
12.11.1997 - Meðalhækkun minni?
Hagstofunni reiknast svo til, miðað við nýjustu gjaldskrá P&S, að símgjöld landsmanna hafi að meðaltali hækkað um 2,5%. Neysluverðsvísitala hækkaði ögn fyrir vikið. Endanleg áhrif hækkunarinnar verða þó ekki ljós fyrr en eftir nokkra mánuði.
11.11.1997 - Ný gjaldskrá í gildi
Ný gjaldskrá fyrir símaþjónustu hér á landi gekk í gildi í dag. Samkvæmt nýju skránni kostar mínútan innanlands að degi til 1,56 kr. en búið var að hækka verðið í 1,99 kr. miðað við umdeilda gjaldskrá sem gekk í gildi um mánaðamótin. Fyrir 1. nóvember kostuðu innanbæjarsamtöl 1,11 kr. þannig að hækkunin varð umtalsverð. Um mánaðamótin var landið gert að einu gjaldsvæði og símtöl milli svæða urðu ódýrari. Þriggja mínútna innanlands símtal að degi til lækkar í dag úr 9,30 kr. í 8 kr.. Á sama hátt lækkar verðið fyrir símtöl í almenna símkerfinu á kvöld-, nætur- og helgidagataxta úr 1 kr. mínútan í 78 aura.
Nokkrir hagsmunaaðilar boðuðu til sameiginlegs blaðamannafundar um gjaldskrárbreytinguna í dag. Þar voru saman komnir Netverjar, Félag eldri borgara, Öryrkjabandalagið, Neytendasamtökin, ASÍ og BSRB. Þar kom fram að hagnaður P&S yrði að líkindum um tveir milljarðar á þessu ári þrátt fyrir að stofnunin barmaði sér yfir því að þurfa að taka á sig kostnað vegna þess að nú væri landið eitt gjaldsvæði. Reiknilíkan P&S var dregið í efa þar sem aukin notkun væri vanætluð, en einnig bent á að 2 milljarða hagnaður af tíu milljarða eign þætti hvarvetna góð tíðindi og fá fyrirtæki í heimi, sem státað geta af slíku. Um kvöldið svaraði starfsmaður P&S þessu í seinni fréttum Stöðvar tvö og sagði að arðsemiskrafan kæmi frá ríkisvaldinu og stofnunin þyrfti mikinn hagnað til þess að standa undir arðvæntingum eigendanna.
8.11.1997 - Kostnaður við símnotkun tvöfaldast
Viðtal var tekið við Eyþór Arnalds formann Netverja í kvöldfréttum Ríkissjónvarpsins og kom meðal annars fram í máli hans að símkostnaður netnotenda hafi tvöfaldast á einu ári og að búsetumismunum væri í gjaldskrám P&S.
7.11.1997 - Stjórn P&S íhugaði afsögn
Í kvöldfréttum Ríkisútvarpsins kom það fram að stjórnarmenn Pósts og síma hafi undanfarna daga velt því fyrir sér í samtölum hvort þeir ættu að segja af sér. Pétur Reimarsson stjórnformaður sagði að niðurstaðan hefði orðið sú að gera það ekki. “Ástæðan er sú að það myndi tefja og hugsanlega spilla málum sem skipta gríðarlega miklu máli, m.a. fyrirhugaðri skiptingu félagsins í tvennt um næstu áramót. Eins hefur það komið fram af hálfu eigenda félagsins að slík afsögn væri afar óheppileg.³ Pétur segir að þarna sé átt við Halldór Blöndal, samgönguráðherra, og Davíð Oddsson, forsætisráðherra.
Stjórn Pósts og síma ákvað í dag að breyta símagjaldskrá sinni enn á ný að tilmælum samgönguráðherra. Nýja gjaldskráin tekur þó ekki gildi strax. Samkvæmt henni verður landið eitt gjaldsvæði eins og nú. Millilandasímtöl verða einnig óbreytt en þau lækkuðu um 22% fyrir viku. Það sem breytist er að það sem áður var kallað staðarsímtöl, lækka aftur. Þau hækkuðu um 76% á laugardaginn en lækka um 37% í næstu viku. Langlínusamtöl innanlands eru úr sögunni. Fyrir viku lækkaði t.d. verð á símtali milli Akureyrar og Reykjavíkur um rúm 50%. Það lækkar enn frekar í næstu viku eða um 12% til viðbótar.
5.11.1997 - Deilt um upplýsingaleynd
Áfram var karpað á þingi í dag. Spurst var fyrir um launakjör æðstu yfirmanna P&S, en samgönguráðherra vildi ekkert um málið segja og kvaðst skorta heimildir til svara um þessi atriði.
Miðstjórn Alþýðusambands Íslands mótmælti harðlega gjaldskrárbreytingu P&S.
4.11.1997 - Hiti í þinginu
Utandagskrárumræða um málefni P&S fór fram á Alþingi í dag. Er óhætt að segja að heitt hafi verið í kolunum. Jóhanna Sigurðardóttir var mjög ómyrk í máli sínu í garð Halldórs Blöndals samgönguráðherra og Ögmundur Jónasson tók í sama streng og sló á létta strengi í senn. Kvað hann stafina “hf³ fyrir aftan Póst og síma standa fyrir “hroka³ og “fyrirlitningu³. Umræðan fór þó fyrir ofan garð og neðan í fjölmiðlum vegna ítrekaðra mismæla samgönguráðherra á nafni þingkonunnar Ástu Ragnheiðar Jóhannesdóttur. Í máli hans kom þó margt athyglisvert fram, eins og að til stæði að bjóða mismunandi tilboð eftir notkun og jafnframt sagði hann fullum fetum að frekari þróun á þessu sviði yrði gert í samráði við Netverja og aðra hagsmunaaðila. Einnig var hart deilt um útreikninga P&S en niðurstaða fannst engin.
3.11.1997 - Spennufall
Stofnun Félags íslenskra Netverja var kynnt vel í fjölmiðlum og viðtöl tekin við forsvarsmenn þess.
Þingflokkur jafnaðarmanna fór fram á það í dag að stjórnsýsluendurskoðun yrði gerð á starfsemi P&S.
2.11.1997 - Félag íslenskra Netverja stofnað
Eftir mótmælafundinn á föstudag þótti mörgum Netverjum ekki nóg að gert og ákváðu að stofna hagsmunasamtök. Stofnfundurinn var haldinn í dag að Hótel Loftleiðum. Eyþór Arnalds var kjörinn formaður og drög lögð að frekari hagsmunabaráttu netnotenda.
Mjög harðort Reykjavíkurbréf Morgunblaðsins kom Netverjum þægilega á óvart, því þar var tekið undir flestar röksemdir þeirra og vinnubrögð P&S fordæmd.
1.11.1997 - Gjaldskrárbreytingin tekur gildi
Í dag varð landið eitt gjaldsvæði og margumrædd gjaldskrá tók breytingum þó til skamms tíma sé. Þessi varnarsigur vannst með fjöldamótmælum Netverja og annarra, sem endaði með því að forsætisráðherra gekk í lið með andæfendum, eins og fram kom í frétt Ríkisútvarpsins í dag. Netverjar létu þá skoðun í ljósi að baráttan væri engan veginn á enda, því boðuð lækkun á hækkun dygði ekki til. Auk þess væri enn eftir að jafna aðstöðumun netfyrirtækja á landsbyggðinni og á suðvesturhorninu. Í sama streng tók Jóhannes Gunnarsson, framkvæmdastjóri Neytendasamtakanna. Jóhanna Sigurðardóttir, þingmaður, lét hafa eftir sér að Halldór Blöndal, samgönguráðherra, ætti að segja af sér eftir þessi mál öll og kvað fyrirhugað að leggja fram vantrauststillögu á hann í þinginu.
31.10.1997 - Netverjar láta í sér heyra
Davíð Oddsson forsætisráðherra hélt fund í morgun með Halldóri Blöndal, samhgönguráðherra sínum, og var gjaldskrárbreyting Pósts og síma ein til umræðu á fundinum. Davíð varðist allra frétta af fundinum, en kvað samgönguráðherra skýra frá “nýjum áherslum³ síðar um daginn. Þær komu svo í ljós, en þá var enn boðuð breyting á gjaldskránni, lækkun á hækkun: tæp 40% í stað um 76% hækkunar á “innanbæjarsímtölum³. Forsendur fyrir þessu eru þó að tekjur fyrirtækisins hækki umfram það, sem áður var áætlað, en ella verður gjaldskráin enn og aftur endurskoðuð!
©1997 Morgunblaðið/Golli
Netverjar afhenda Halldóri Blöndal samgönguráðherrra mótmælaundirskriftir sínar á Alþingisþrepunum. Að baki honum standa Ragnar Arnalds, varaforseti Alþingis, og Guðmundur Björnsson, forstjóri Pósts og síma hf.
Netverjar afhentu á sjötta þúsund mótmælaundirskrifta á Austurvelli klukkan þrjú í dag og veittu þeim viðtöku Ragnar Arnalds, varaforseti Alþingis, Halldór Blöndal, samgönguráðherra, og Guðmundur Björnsson forstjóri P&S. Eftir það steðjuðu Netverjar svo út á Ingólfstorg og héldu fjölmennan mótmælafund. Þar stigu meðal annarra á stokk Hallgrímur Thorsteinsson, sem stýrði fundinum, Jóhannes Gunnarsson, framkvæmdastjóri Neytendasamtakanna, sem kvað samgönguráðherra reyna að skapa úlfúð milli landsbyggðarinnar og höfuðborgarsvæðisins með málflutningi sínum. Guðmundur Árni Stefánsson, þingmaður mótmælti vinnubrögðum ríkisstjórnarinnar og boðaði lagafrumvarp í tengslum við málið strax á mánudag.
Fleiri mótmæltu en Netverjar, því BSRB, Félag eldri borgara, Heimdallur, Félag Tölvunarfræðinema við Háskólann, Æskulýðssamband Íslands, Starfsmannafélag Reykjavíkurborgar sem og borgarráð ályktuðu öll gegn gjaldskrárbreytingunni. Þá kom það fram að P&S væru síður en svo hættir að hækka, því nú stæði til að hækka auglýsingaverð í Símaskránni verulega.
30.10.1997 - Æ fleiri mótmæla
Stöðugt fleiri mótmæla gjaldskrárbreytingu P&S og hefur Davíð Oddsson forsætisráðherra ákveðið að grípa í taumana. Í viðtali í fréttum Stöðvar tvö dró hann beinlínis í efa fullyrðingar P&S.
Jón Magnússon, varaformaður Neytendasamtakanna, sagði að samtökin stæðu á því fastara en fótunum að þessi mikla hækkun væri óþörf, því forráðamenn P&S hefðu staðfest að kostnaður við símtöl milli húsa væri nánast sá sami og milli landshluta. Öryrkjabandalag Íslands mótmælti einnig hækkuninni harðlega, sem kæmi harðar niður á öryrkjum en flestum þjóðfélagshópum öðrum.
30.10.1997 - Frétt í degi
Dagur greindi frá því að vegna gjaldskrárbreytinga og þá ekki síður breytinga á lengd skrefa hefði hálftíma vinaspjall í síma hækkað um 124% á einu ári. Skrefið verður nú 100 sekúndur, en hefur verið 180 sekúndur síðastliðna mánuði. Fyrir tæpu ári var það hins vegar 240 sekúndur. Elías Snæland Jónsson, ritstjóri Dags, reit um málið í forystugrein blaðsins, sem bar fyrirsögnina "Hroki risaeðlunnar".
Það sem ekki hvað síst hefur farið fyrir brjóstið á gagnrýnendum P&S er leyndarhyggjan og pukrið, sem einkennir störf stofnunarinnar. Ekki hvað síst hefur þetta orðið bert eftir ítrekaðar tilraunir til þess að fá upplýsingar um útreikniforsendur P&S, sem í umræðu undanfarinna daga hefur slegið um sig tölum sem engin leið er að reyna. Ómar Friðriksson, blaðamaður Morgunblaðsins, skrifaði fréttaskýringu um málið í dag.
Sama dag ritaði Þorsteinn Víglundsson athyglisverða grein í Viðskiptablað Morgunblaðsins um samkeppni á Netinu.
29.10.1997 - Leikar æsast
Viðskiptablaðið reiknaði út - miðað við tækar tölur úr rekstri P&S - að gjaldskrárbreytingin myndi skila rúmlega 500 milljóna tekjuauka til P&S. Póst- og fjarskiptastofnunin, sem á að hafa eftirlit með P&S, getur þegar til kastanna kemur ekki haft áhrif á gjaldskrárbreytingar, sem samgönguráðherra hefur undirritað. Hins vegar er til umræðu þar á bæ, að vísa málinu til Samkeppnisstofnunar. Finnur Ingólfsson viðskiptaráðherra tekur í sama streng.
Halldór Blöndal samgönguráðherra sagði á hinn bóginn að gjaldskrárbreytinguna nauðsynlega vegna yfirvofandi alþjóðlegrar samkeppni við P&S og kvaðst bera ábyrgð á hækkuninni. Í fréttum Ríkissjónvarpsins kom fram að kostnaður Netnotenda myndi aukast um 149%.
Þá sendi þingflokkur Jafnaðarmanna frá sér tilkynningu um að “sú ákvörðun Alþingis að gera landið að einu gjaldsvæði hafi ekki verið hugsuð til þess að veita forráðamönnum Pósts og síma hf. skálkaskjól til þess að hækka álögur á mikinn meirihluta þjóðarinnar.³
Á Netinu er hafin undirskriftasöfnun gegn gjaldskrárbreytingunni og boðað hefur verið til útifundar föstudaginn 31. nóvember til þess að mótmæla hækkuninni.
Jónas Kristjánsson, ritstjóri DV, skrifaði leiðara í blaðið í dag þar sem hann hann réðist harkalega gegn stefnu P&S og sagði ennfremur: "Með breytingu símans úr einokunarstofnun í einokunarfyrirtæki hafa brostið fjötrar, sem áður héldu verðinu í skefjum. Niðurstaðan verður fyrirbæri, sem sameinar verstu galla ríkiseinokunarfyrirtækja og fáokunarfyrirtækja á samkeppnismarkaði."
Guðmundur Björnsson, forstjóri P&S kom í viðtal hjá Eggerti Skúlasyni í þættinum 19-20 á Stöð tvö og þótti ekki bæta almenningsálitið á stofnunni með því.
28.10.1997 - P&S verst allra frétta
Fréttamenn gengu í dag á talsmenn Pósts og síma og spurðu út í fullyrðingar þeirra um að gjaldskrárbreytingin myndi ekki hafa í för með sér auknar tekjur. Hrefna Ingólfsdóttir, blaðafulltrúi P&S, sat við sinn keip í þessum málum, en harðneitaði hins vegar að láta uppi forsendur þær sem P&S notast við í útreikningum sínum. Eggert Skúlason, fréttamaður Stöðvar tvö, óskaði þó eftir forsendunum á grundvelli Upplýsingalaga, en svarið var hið sama og fyrr: "Nei".
Um annað mál er vart talað í þjóðfélaginu að ekki sé minnst á þjóðarsálir útvarpsstöðvanna. Á Netinu er umræðan ekki minni, en Netverjar eru að hugsa sér til hreyfings.
27.10.1997 - Gjaldskrárbreyting P&S kynnt
Póstur og sími kynnti í dag gjaldskrárbreytingar, sem gildi taka um mánaðamótin. Þá verður landinu breytt í eitt gjaldsvæði, en hækkar verð “innanbæjarsímtals³ um 80%. Talsmenn P&S bera að breytingin verði fyrirtækinu ekki til tekjuauka, en á þá fullyrðingu hafa verið bornar brigður. Jóhannes Gunnarsson, framkvæmdastjóri Neytendasamtakanna, rengdi beinlínis staðhæfingar stofnunarinnar í samtali við fréttamann Stöðvar tvö, en á Netinu voru menn á einu máli um hvaða afleiðingar þetta hefði.
| 
