ATH: Starfsemi félags Netverja liggur því miður niðri.

Frétt Frétt Brodda Broddasonar í hádegisfréttum Ríkisútvarpsins hinn 1. nóvember 1997. Frá og með deginum í dag er landið allt eitt símagjaldsvæði. Innanbæjarsímtöl hafa hækkað mikið í verði en langtímasímtölin eru ódýrari en áður. Það kann að vera að einhverjir haldi ekki alveg þræðinum í símagjaldskrármálum þessa dagana, enda eru yfirlýsingar ráðamanna og fréttir ekki þær sömu frá degi til dags og gjaldskrár taka breytingum án þess að gera það. Í dag er fyrsti nóvember og í dag breytist gjaldskrá símans í samræmi við þær breytingar sem kynntar voru í byrjun þessarar viku. Millilandasímtöl eru frá og með deginum í dag, næstum því fjórðungi ódýrari en þau voru. Hver mínúta í símtali til Danmerkur er 10 kallinum ódýrari í dag en í gær, 17 krónur lækkun er á Ameríkumínútunni. Þá er landið allt eitt gjaldsvæði, m.ö.o., það er sama hvert á land er hringt, jafnlangt símtal er jafnt dýrt. Í dag kostar þriggja mínútna símtal innanlands að degi til, 9 krónur og 30 aura en kostaði í gær tæpar 7 krónur innanbæjar. Milli svæða kostaði það í gær hins vegar 16 krónur. Klukkutíma símtal kostar í dag rúmlega 120 krónur en kostaði í gær, tæpar 70 krónur innanbæjar, það kostaði hins vegar miklu meira milli svæða. Með breytingunum er jafnframt búið að samræma skrefafjölda í fastagjaldi símans, nú verða þau 200 en þau voru 400 á landsbyggðinni. Þetta var allt saman kynnt fyrir tæpri viku. Þá brast hins vegar á mótmælaalda sem náði hámarki í gær, þegar segja má að forsætisráðherrann hafi gengið til liðs við uppreisnarmenn. Niðurstaðan varð sú að aftur verður gjaldskránni breytt. Hvenær það verður liggur ekki fyrir en næsti stjórnarfundur Pósts og síma er á föstudaginn, 7. nóvember sem er byltingarafmæli gömlu Sovétríkjanna. Ekki fyrr en einhvern tíma eftir þann fund verður hinn margmótmæltu glænýju gjaldskrá breytt, til þess sem samgönguráðherrann kynnti í gær. Það verður heldur ekki fyrr síðar í haust að Póstur og sími mun opinbera þær forsendur sem liggja til grundvallar gjaldskrárákvörðunum. En þótt Póstur og sími hf. taki á sig 100-400 milljóna króna kostað með nýjum gjaldskrám, þá er ekki eins og það sligi fyrirtækið því hagnaðurinn á þessu ári verður væntanlega um 2 milljarðar króna. Allur réttur áskilinn. ©1997 Ríkisútvarpið.