ATH: Starfsemi félags Netverja liggur því miður niðri.

Viðtal Loga Bergmanns Eiðssonar í kvöldfréttum Ríkissjónvarpsins 8. nóvember 1997. Formaður Samtaka netnotenda segir að kostnaður við símnotkun hafi tvöfaldast á einu ári, og að fólki sé mismunað eftir búsetu. Stjórn Pósts og síma ákvað á fundi sínum í gær að hækka mínútugjald innbæjarsímtala um 40% frá gömlu gjaldskránni sem gilti til 1. nóvember. Mínútugjaldið hækkar úr 1,11 í 1,56 og þessi hækkun hefur farið mjög fyrir brjóstið á netverjum sem benda á að hækkunin er mjög mikil á aðeins einu ári. "Eyþór Arnalds, formaður Félags íslenskra Netverja: Það er náttúrulega hægt að reikna þetta á svo margan hátt og það er nú athyglisvert að það yfirleitt gert ráð fyrir 3 mínútna símtölum og við erum yfirleitt ekki að tala um slík símtöl varðandi Internetið, oft símtöl uppí 1, 2, klukkutíma og ég mundi segja að þetta er allavega tvöföldun á taxtanum, það er engin spurning." Samtökin sem voru nýlega stofnuð eru með um 2 þúsund félaga og hlutverk þeirra verður að berjast fyrir hagsmunum þeirra sem nota Netið. Þau benda m.a. á að þó að breytingar Pósts og síma eigi að jafna vægi milli landshluta, sé fyrirtækið í sama mund að mismuna fólki eftir búsetu. Eyþór Arnalds: "Og það er mjög athyglisvert að skoða það að það er kílómetragjald af sem sagt, beinlínutengingum og t.d. aðili sem er á Vík í Mýrdal, eða einhvers staðar, ætlar að bjóða upp á Internet-þjónustu þar, hann þarf að greiða miklu hærra gjald heldur en sá sem er t.d. í Reykjavík. Og þetta er mjög sérkennilegt að þetta hafi ekki verið leiðrétt á sama tíma og það er verið að jafna gjaldskrána í talsímanum. Þetta hreinlega gerir það að verkum að það er ekki hægt, það er enginn rekstrargrundvöllur fyrir Internet-þjónustu á smærri stöðum." Allur réttur áskilinn. ©1997 Ríkissjónvarpið.