ATH: Starfsemi félags Netverja liggur því miður niðri.

Ruslpóstur Félag íslenskra netverja stendur fyrir átaki gegn ruslpósti (spam). Við hvetjum alla netverja til að kynna sér það. Viðbrögð við ruslpósti. Varnir gegn ruslpósti. Viðbrögð við ruslpósti Ruslpóstur er hvimleitt vandamál og margoft hefur vaknað sú spurning hvernig sé best að bregðast við ruslinu. Þá verður fátt um góð svör enda staðreyndin sú að því miður er engin ein leið best. Eftirtalin viðbrögð hafa hafa verið notuð í gegnum tíðina og hafa reynst mönnum misvel: Ekki lesa ruslpóstinn því ólesinn ruslpóstur hefur ekki tilskilin áhrif. Ekki skipta við fyrirtækið sem sendi þér ruslpóst. Sumir hafa að vana að hringja í fyrirtækið upp á gamla mátann og kvarta yfir ruslpóstinum kurteislega, en ákveðið. Þetta getur verið mjög sterkt því símtöl eru persónuleg og einnig verður fyrirtækið vart við það ef skiptiborðið hjá því teppist vegna flóðbylgju kvartana. Tilkynntu aðgangsveitandanum þínum að þér hafi borist ruslpóstur með því að senda afrit af ruslinu á notandanafnið abuse eða spam (bara eitt bréf!), hann getur í flestum tilfellum metið hvað er best að gera í stöðunni. Ekki senda kvartanir um ruslpóst á önnur netföng en spam@þinnisp.is eða abuse@þinnisp.is . Vertu kurteis, það að þú færð ruslpóst er ekki internetþjónustunni þinni að kenna. Að lokum er hægt að senda kvörtunarbréf, með afriti af ruslinu, á notandann root, postmaster, spam, eða abuse hjá vefléni þess sem sendi þér ruslpóst. Fara verður vandlega yfir alla hausana í ruslpóstinum til að sjá hvaðan hann raunverulega barst. Ekki er alltaf allt sem sýnist, og margur ruslpósturinn er falsaður. Ef þú ert ekki viss, talaðu þá við aðgangsveitandann þinn, sbr. að ofan. Ef um íslenskan ruslpóst er að ræða, frá aðila sem er ekki venjulegur notandi hjá internetþjónustu, þá getur virkað að tilkynna hann kurteislega til abuse@isnet.is, þarsem ruslpóstur brýtur í bága við nokunarskilmála Isnet. Eins og áður þá verður að lesa alla hausana í ruslpóstinum fyrst. Íslenskan ruslpóst sem brýtur 14. grein laga um húsgöngu- og fjarsölusamninga má tilkynna til Samkeppnisstofnunar, en sú stofnun fer með framkvæmd laganna fyrir hönd viðskiptamálaráðuneytisins. Ruslpóstur brýtur þessi lög m.a. ef hann er sendur aðila sem áður hefur afþakkað beina markaðssókn hjá Hagstofu Íslands eða ef móttakandi hefur áður fengið ruslpóst frá sama aðila (einungis er löglegt að senda hverjum einstaklingi eitt bréf, nema móttakandi sérstaklega tilkynni annað). Á vef Bjarna R. Einarssonar má finna dæmi um slika kvörtun. Almennt gildir: Haltu ró þinni. Of heitar tilfinningar í garð þeirra sem senda ruslpóst hjálpa engum, nema e.t.v. helst aðilanum sem sendi þér ruslpóstinn. Sendendur ruslpósts eru yfirleitt svo langt leiddir að þeir njóta allrar athygli - sér í lagi neikvæðrar athygli. Aldrei senda mörg eintök af sömu kvörtuninni í einu. Slíkt er ruslpóstur, engu betri en sá sem þú fékkst. Vertu alltaf kurteis. Kurteisi (ásamt ákveðni) skilar alltaf betri árangri. Varnir gegn ruslpósti Það er mjög erfitt að koma í veg fyrir að maður fái ruslpóst. Eina raunhæfa leiðin er að halda netfanginu sínu leyndu. Auðvitað er vonlaust að ætla að halda því algjörlega leyndu, en það eru nokkur atriði sem vert er að hafa í huga og geta dregið úr magni þess ruslpósts sem manni berst. Það er mikilvægt að kynna sér vandlega hver stefna þess sem biður um netfangið er, og hvað hann hyggst gera við það. Ef slíkar upplýsingar eru ekki fyrir hendi þá má gera ráð fyrir að netfangið þitt verði dreyft til annara aðila notað á óábyrgan hátt. Líttu eftir smáu letri á vefsíðum sem spurja mann um netfang. Oft er þar reitur sem þarf að haka í til að fá ekki ruslpóst. Það er góð regla að gefa aldrei upp netfangið sitt að óþörfu. Hugbúnaður og vefsvæði krefja mann oft um netfang áður en lagt er af stað, í flestum tilfellum til þess eins að fyrirtækið geti sent manni auglýsingar um vörur sínar og þjónustu. Í fæstum tilfellum er rauveruleg þörf fyrir að afhenda þessar upplýsingar, og í þá er einfalt að skálda eitthvað. Hafi maður fleiri en eitt netfang, þá er gott að gefa í vafatilfellum upp það netfang sem er síst varanlegt. Þá ef maður fær flóð af ruslpósti þá losnar maður allavega við hann þegar maður hættir að nota það netfang. Það borgar sig að halda aðalnetfanginu manns sem mest óskráðu. Allt sem maður skrifar á póstlista með vefviðmóti, og ráðstefnusvæði bæði á vefnum og á Usenet, er aðgengilegt hverjum sem er. Óprúttnir einstaklingar nota oft forrit til að þræða öll innsend bréf í fréttahópunum og sigta út öll netföng úr bréfahausunum og texta bréfanna, og búa til lista af netföngum sem gengur svo kaupum og sölum. Það er hægt að breyta/dulbúa netfang sendandans þannig að sjálvirk sigtiforrit lesi það vitlaust, en mennskir lesendur geti skilið netfangið og notað það til að senda viðkomandi póst. Slíkar aðgerðir eru fremur óþjálar í framkvæmd og valda oft vandræðum á póstlistum.