ATH: Starfsemi félags Netverja liggur því miður niðri.

Tilurð félagsins. Endrum og sinnum höfðu heyrst hugmyndir um að Netverjar þyrftu að bindast samtökum. Nauðsynin var mönnum þó ekki fyllilega ljós, enda Netverjar breiður hópur, sem ef til vill átti erfitt með að sameinast um hagsmuni sína, enda liggja þeir á þröngu sviði. Helst var að mönnum gremdist skilningsleysi þeirra, sem ekki eru á Netinu, á högum Netverja, en sú ástæða var ekki næg til þess að stofna félag. Þrýstingurinn kom úr óvæntri átt. Póstur og sími, sem aldrei hefur átt marga aðdáendur í hópi Netverja, tók að sér að þjappa þeim svo saman að félagsstofnun var óumflýjanleg. 27. október tilkynnti stofnunin fyrirvaralaust um mjög mikla gjaldskrárbreytingu um leið og landinu var breytt í eitt gjaldsvæði. Þá gerðist hið óvænta, að mælirinn varð loks fullur á Netinu. Reyndar voru langflestir símnotendur á því að gjaldskrárbreytingin væri með ólíkindum og létu duglega í sér heyra. En Netverjum fannst sem Póstur og sími væri sérstaklega að beina spjótum sínum að sér og hygðist nú mjólka notendur Netsins eins og unnt væri. ©1997 Morgunblaðið/Golli Netverjar fjölmenntu á Ingólfstorg föstudaginn 31. október og mótmæltu fyrirhugaðri gjaldskrárbreytingu kröftuglega. Hafist var handa við að safna undirskriftum á Netinu til þess að mótmæla þessari einhliða gerð Pósts og síma og á örfáum dögum söfnuðust þúsundir undirskrifta reiðra Netverja. Menn tala um að hlutirnir gerist hraðar á Netinu en í raunheimi og hið sama átti við í þessu tilviki. Með örskömmum fyrirvara var boðað til útifundar á Ingólfstorgi og fötufaginn 31. október hópaðist á annað þúsund Netverja á Austurvöll þar sem ráðamönnum voru afhentar undirskriftirnar og síðan á Ingólfstorg þar sem menn létu í sér heyra, eins og hægt er að hlusta á hér. Þegar hér var komið við sögu voru stjórnendur Pósts og síma loks að átta sig á því að þeir höfðu lent í alvarlegum árekstri við alla þjóðina. Stofnunin varð uppvís að því að dreifa villandi upplýsingum um hækkunina, hún neitaði að gefa upp forsendur hennar og svo framvegis. Eftir að Halldór Blöndal samgönguráðherra ráðgaðist við Davíð Oddsson forsætisráðherra um málið tilkynnti hann að breytingar yrðu gerðar á gjaldskránni. Seinna kom reyndar í ljós að stjórn Pósts og síma hugleiddi afsögn á þessu stigi málsins, en var talin ofan af því. Á hinn bóginn lét stjórnin þannig í fjölmiðlum að ekkert væri að vinnubrögðum stofnunarinnar, en lét í veðri vaka að vandinn væri í raun aðeins herfileg mistök í kynningarmálum fyrirtækisins. Það kom brátt í ljós að Póstur og sími hafði aðeins í huga lækkun á hækkun sinni, en Netverjar vildu alvöru lækkun. Það varð úr eftir að hinir og þessir höfðu ráðgast við á Netinu að ástæða væri til þess að stofna félag Netverja. Með jafnskömmum fyrirvara og annað í þessarri baráttu var boðað til stofnfundar að Hótel Loftleiðum hinn 2. nóvember. Á annað hundrað manns komu á fundinn þó fyrirvarinn væri skammur og þar var Eyþór Arnalds kjörinn formaður og átta manna stjórn með honum. Stjórnin tók þegar til óspilltra málanna og samdi drög að stefnu félagsins, sem allir ættu að geta sætt sig við. (Að minnsta kosti allir félagsmenn.) Baráttan hefur fyrst og fremst farið fram í fjölmiðlum, en árangur hefur ekki síður náðst í samtölum við ráðamenn, með samráði við aðra hagsmunahópa sem eru samsinna Netverjum um gjaldskrárbreytinguna og svo framvegis. Baráttan er rétt að hefjast og mun ekki snúast um gjaldskrá Pósts og síma eina, heldur alla þá hagsmuni sem Netverjar eiga sameiginlega, svo sem tæknilega skipulagningu Netsins hér á landi, tryggingu lýðréttinda á Netinu svo frelsið til tjá- og viðskipta verði ekki látið víkja fyrir ritskoðun og höftum.